Welcome PradhiKarthik: அரசியல்
Showing posts with label அரசியல். Show all posts
Showing posts with label அரசியல். Show all posts

Wednesday, May 29, 2013

தேமுதிகவில் மீண்டும் கலகம்: ஜெ.வை சந்தித்தார் மற்றொரு எம்.எல்.ஏ. சேந்தமங்கலம் சாந்தி

தேமுதிகவில் மீண்டும் கலகம்:
 ஜெ.வை சந்தித்தார் மற்றொரு எம்.எல்.ஏ. சேந்தமங்கலம் சாந்தி

சென்னை: ஓய்ந்திருந்த தேமுதிக எம்.எல்.ஏக்களின் கலகக் குரல் மீண்டும் வெடித்திருக்கிறது. சேந்தமங்கலம் தொகுதி தேமுதிக எம்.எல்.ஏ. சாந்தி இன்று தமிழக முதல்வர் ஜெயலலிதாவை சந்தித்து தொகுதி மக்களின் பிரச்சனைக்காக மனு கொடுத்தார். சட்டசபை தேர்தலில் அதிமுக அணியில் இடம் பெற்று தேர்தலை சந்தித்தது தேமுதிக. இதன் மூலம் 29 எம்.எல்.ஏக்களைப் பெற்றது அந்த கட்சி. பின்னர் சிறிது காலத்திலேயே அதிமுகவுடன் மோதல் ஏற்பட்டு கூட்டணியை விட்டு வெளியேறியது. பின்னர் கடந்த ஆண்டு அக்டோபர் மாதம் அக்கட்சியில் பெரும் அதிருப்தி வெடித்தது. அக்கட்சியின் மதுரை சுந்தரராஜன், திட்டக்குடி தமிழழகன்,மைக்கேல் ராயப்பன், அருண்பாண்டியன் ஆகிய எம்.எல்.ஏக்கள் தமிழக முதல்வர் ஜெயலலிதாவை திடீரென சந்தித்துப் பேசினர். அவர்களைத் தொடர்ந்து செங்கம் எம்.எல்.ஏவும் விஜயகாந்த் தலைமைக்கு எதிர்ப்பு தெரிவித்தார். இந்த 5 எம்.எல்.ஏக்களுக்கும் சட்டசபையில் தனி இடமும் ஒதுக்கப்பட்டிருந்தது.
அத்துடன் அதிருப்தி எம்.எல்.ஏக்களுக்கும் தேமுதிக எம்.எல்.ஏக்களும் சட்டசபையில் பெரும் மோதலே நடந்தது. இதில் 6 விஜயகாந்த் ஆதரவு தேமுதிக எம்.எல்.ஏக்கள் 6 மாத காலத்துக்கு சட்டசபையில் இருந்து சஸ்பென்ட் செய்யபட்டிருக்கின்றனர். இதனால் தேமுதிகவின் பலம் 18 எம்.எல்.ஏக்களானது. இதனால் ராஜ்யசபா தேர்தலை எப்படி எதிர்கொள்வது என்று அந்த கட்சி குழம்பிப் போயுள்ளது. இந்நிலையில் கடந்த சில மாதங்களாக ஓய்ந்திருந்த இந்த அணி தாவும் படலம் தற்போது மீண்டும் விஸ்வரூபம் எடுத்திருக்கிறது. சேந்தமங்கலம் தொகுதியைச் சேர்ந்த தேமுதிக எம்.எல்.ஏ. சாந்தி திடீரென இன்று தமிழக முதல்வர் ஜெயலலிதாவை சந்தித்துப் பேசினார். இச்சந்திப்பின் போது 3வது ஆண்டில் அடி எடுத்து வைக்கும் தமிழக முதல்வர் ஜெயலலிதாவுக்கு வாழ்த்துகளைத் தெரிவித்துக் கொண்டதாகவும் தமது தொகுதியின் பிரச்சனைகளுக்காக முதல்வரிடம் மனு கொடுத்ததாகவும் அவர் கூறினார்.

இன்று முதல்வர் ஜெயலலிதாவை சாந்தி சந்தித்திருப்பதன் மூலம் தேமுதிக அதிருப்தி எம்.எல்.ஏக்களின் பலம் 6ஆக அதிகரித்துள்ளது. சட்டசபையில் விஜயகாந்த் ஆதரவு எம்.எல்.ஏக்களின் எண்ணிக்கை 17ஆகக் குறைந்துள்ளது. ஆக மீண்டும் தேமுதிக கூடாராத்தில் கலகக் குரல்!

Sunday, May 26, 2013

திருக்கோவிலூர் அரசு மருத்துவமனையில் தே.மு.தி.க.,வினர் விரட்டியடிப்பு

திருக்கோவிலூர் அரசு மருத்துவமனையில் தே.மு.தி.க.,வினர் விரட்டியடிப்பு: அரசு விழாவில் திடீர் பரபரப்பு  


திருக்கோவிலூர் : திருக்கோவிலூர் அரசு மருத்துவமனை அடிக்கல் நாட்டு விழாவிற்கு, கட்சி கொடியுடன் வந்த, தே.மு.தி.க.,வினரை, அ.தி.மு.க.,வினர் அடித்து விரட்டியதால், பரபரப்பு ஏற்பட்டது.

விழுப்புரம் மாவட்டம், திருக்கோவிலூர் அரசு மருத்துவமனையில், 2.25 கோடி ரூபாய் மதிப்பில், புதிய கட்டடம் கட்டுவதற்கான அடிக்கல் நாட்டு விழா, நேற்று காலை, 8:30 மணிக்கு நடந்தது. அமைச்சர் மோகன் பங்கேற்றார். கட்சி கொடியுடன் அங்கு வந்த, தே.மு.தி.க., மாவட்ட துணைச் செயலர் உமாசங்கர் மற்றும் நிர்வாகிகள், "தொகுதி, எம்.எல்.ஏ.,வை, ஏன் அழைக்கவில்லை?' என, அமைச்சரிடம் கேள்வி எழுப்பினர்.

இதற்கு அமைச்சர், "அரசு விழாவில், யாரும் கொடி பிடிக்கக் கூடாது; கொடியை இறக்குங்கள். எதுவாக இருந்தாலும் பேசிக் கொள்ளலாம்' என்றார். இதை கேட்காமல் தொடர்ந்து, கோஷம் எழுப்பினர்.

ஆத்திரமடைந்த அ.தி.மு.க.,வினர், தே.மு.தி.க.,வினரை அடித்து விரட்டினர். தொடர்ந்து விழா நடந்தது. விழா முடிந்து காரில் வெளியில் வந்த அமைச்சரை மறிக்க, தே.மு.தி.க.,வினர் தயாராக இருந்தனர். அமைச்சர், கலெக்டர் உள்ளிட்ட, அதிகாரிகளை, போலீசார், பாதுகாப்புடன் அங்கிருந்து அனுப்பினர். இதனால், மருத்துவமனை வளாகத்தில் பரபரப்பு ஏற்பட்டது. திருக்கோவிலூர் போலீசில், இரு தரப்பினரும் புகார் செய்தனர். இதனால், போலீஸ் ஸ்டேஷன் வளாகத்தில், பதட்டம் நிலவியது; போலீசார் சமாதானம் செய்து அனுப்பினர்.

Saturday, May 25, 2013

டாக்டர் ராமதாஸுடன் ஸ்டாலின், கனிமொழி சந்திப்பு

டாக்டர் ராமதாஸுடன் ஸ்டாலின், கனிமொழி சந்திப்பு: ராஜ்யசபா தேர்தலுக்கு கை கொடுக்குமா பாமக?


சென்னை: திமுகவின் எம்.பி. டி.கே.எஸ். இளங்கோவனைத் தொடர்ந்து அக்கட்சித் தலைவர் கருணாநிதியின் மகன் மு.க.ஸ்டாலின், மகள் கனிமொழி ஆகியோரும் பாமக நிறுவனர் டாக்டர் ராமதாஸை மருத்துவமனையில் நலம் விசாரித்திருக்கின்றனர். எதிர்வரும் ராஜ்யசபா தேர்தலை முன்னிட்டே பாமகவுடனான இந்த நெருக்கத்தை திமுக வெளிப்படுத்துவதாக அரசியல் பார்வையாளர்கள் கருதுகின்றனர்.

திராவிட கட்சிகள் எதனுடனும் கூட்டணி கிடையாது என்று தற்போதும் கூட பாமக அறிவித்து வருகிறது. அதிமுகவைப் பொறுத்தவரையில் பாமக எதிரியாகிவிட்டது. ஆனால் மற்றொரு திராவிடக் கட்சியான திமுகவுக்கோ பாமகவின் தயவு இப்போது தேவைப்படுகிறது. இதனால் வேறுவழியின்றி என்னதான் விமர்சித்தாலும் பரவாயில்லை இறங்கிப் போவது என முடிவெடுத்திருக்கிறது போல..அப்படி என்ன தேவை? எதிர்வரும் ராஜ்யசபா தேர்தல்தான்!

ராஜ்யசபா தேர்தலில் ஒரு எம்.பி.க்கு 34 எம்.எல்.ஏக்கள் வாக்களிக்க வேண்டும். திமுகவுக்கு சட்டசபையில் 23 எம்.எல்.ஏக்கள்தான் இருக்கின்றனர். இதனால் தேமுதிகவுடன் திமுக பேச்சுவார்த்தை நடத்தியது. இம்முறை கருணாநிதியின் மகள் கனிமொழிக்கு தேமுதிக ஆதரவளித்தார்ல் அடுத்த ஆண்டு விஜயகாந்தின் மச்சான் சதீஷுக்கு திமுக ஆதரவளிக்கும் என்பதுதான் பேரம். ஆனால் விஜயகாந்தோ இம்முறை சுதீஷ் என்பதில் உறுதியாக இருந்தார். இதில் எந்த ஒரு முடிவும் எட்டப்படவில்லை. தற்போதைய நிலையில் 18 எம்.எல்.ஏக்கள்தான் ராஜ்யசபா தேர்தலில் வாக்களிக்க முடியும் என்பதால் பேசாமல் தேர்தலையே புறக்கணித்துவிட்டால் என்ன? என்ற யோசனையில் இருக்கிறதாம் தேமுதிக..

இதை உணர்ந்து கொண்ட திமுக, தங்களுக்குத் தேவையான 11 எம்.எல்.ஏ.க்களை எப்படிப் பெறுவது என்று போட்டுப்பார்த்த கணக்கில் உதயமானது பாமக, காங்கிரஸ், புதிய தமிழகத்தை இணைத்துக் கொள்வது என்பதுதான் அது. காங்கிரஸ் கட்சிக்கு 5 எம்.எல்.ஏக்கள், பாமகவுக்கு 3 எம்.எல்.ஏக்கள், புதிய தமிழகத்திடம் 2 எம்.எல்.ஏக்கள் என 10 எம்.எல்.ஏக்கள் இருக்கின்றனர். என்னதான் மத்திய அரசில் இருந்து திமுக வெளியேறினாலும் கருணாநிதி கேட்டுக் கொண்டால் காங்கிரஸ் மேலிடம் ஆதரிக்கக் கூடும் என்று திமுக நம்புகிறது. ரொம்ப தூரம் விலகிப் போய்க் கொண்டிருந்த பாமகவை மரக்காணம் கலவரத்தை முன்வைத்து எட்டிப் பிடிக்க முயற்சித்தது திமுக. இப்போது ராமதாஸ் மருத்துவமனையில் இருக்க இன்னும் நெருக்கமாகிக் கொண்டிருக்கிறது.

புதிய தமிழகம் கட்சிக்கு ஒரு லோக்சபா தொகுதி கொடுக்கப்படும் என்ற உறுதியுடன் அக்கட்சித் தலைவர் டாக்டர் கிருஷ்ணசாமியிடம் பேரம் பேசப்பட்டிருக்கிறதாம். எஞ்சிய ஒரு எம்.எல்.ஏ யாராக இருக்க முடியும்? அது தேமுதிக அல்லது தமுமுகவைச் சேர்ந்தவராக இருக்கலாம் என்கிறது அறிவாலய வட்டாரங்கள்.... இதுதான் டாக்டர் ராமதாஸை ஸ்டாலின் மற்றும் கனிமொழி ஆகியோர் சந்தித்துப் பேசியதன் பின்னணியாக சொல்லப்படுகிறது.

Wednesday, May 22, 2013

கருத்துக் கணிப்பு :இன்று தேர்தல் நடந்தால்... அதிமுகவுக்கு 30 தொகுதி! காங். கட்சிக்கு செம தோல்வி

கருத்துக் கணிப்பு :இன்று தேர்தல் நடந்தால்... அதிமுகவுக்கு 30 தொகுதி! காங். கட்சிக்கு செம தோல்வி
 
டெல்லி: மத்தியில் ஆளும் காங்கிரஸ் தலைமையிலான ஐக்கிய முற்போக்குக் கூட்டணி அரசு இன்று 5வது ஆண்டில் அடியெடுத்து வைக்கிறது. இந்த நிலையில் தற்போது தேர்தல் நடைபெற்றால் காங்கிரஸ் கட்சி தோல்வியையே சந்திக்க நேரிடும் என்றும் தமிழகத்தில் அதிமுக 30 தொகுதிகளைக் கைப்பற்றும் என்றும் கருத்துக் கணிப்புகள் தெரிவித்துள்ளன.

ஹெட்லைன்ஸ் டுடே- சி வோட்டர் இணைந்து தற்போது லோக்சபா தேர்தல் நடைபெற்றால் முடிவுகள் எப்படி இருக்கும் என்பது பற்றி ஒரு கருத்துக் கணிப்பை நடத்தியது. இந்த கருத்துக் கணிப்பில் காங்கிரஸ் தலைமையிலான ஐக்கிய முற்போக்குக் கூட்டணி தோல்வியை சந்திக்கும் என்று கூறப்பட்டுள்ளது. தமிழகத்தில் 30 தொகுதிகளை அதிமுக கைப்பற்றும் என்றும் திமுகவுக்கு 4 தொகுதிகள்தான் கிடைக்கும் என்றும் அந்த கருத்துக் கணிப்பில் தெரிவிக்கப்பட்டுள்ளது.


தேசிய அளவில் வாக்கு சதவீதம் எப்படி?

தேசிய அளவில் பாரதிய ஜனதா தலைமையிலான தேசிய ஜனநாயகக் கூட்டணி 31% வாக்குகளையும் காங்கிரஸ் 24% வாக்குகளையும் பெறும் என்று தெரியவந்துள்ளது. இதர கட்சிகளுக்கு மொத்தமாக 45% வாக்குகள் கிடைக்கும் என்கிறது ஹெட்லைன்ஸ் டுடே கருத்துக் கணிப்பு


பாஜகவுக்கு 137 தொகுதிகள்!

இப்போது தேர்தல் நடத்தப்பட்டால் பாரதிய ஜனதா கட்சி 137 தொகுதிகளைக் கைப்பற்றி தனிப்பெரும் கட்சியாக இருக்குமாம். ஐக்கிய ஜனதா தளத்துக்கு 19 தொகுதிகளும் சிவசேனாவுக்கு 14 தொகுதிகளும் சிரோமணி அகாலி தளத்துக்கு 6 தொகுதிகளும் கிடைக்குமாம். மொத்தமாக பாஜக தலைமையிலான தேசிய ஜனநாயகக் கூட்டணிக்கு 179 தொகுதிகள் கிடைக்கும் என்கிறது கருத்துக் கணிப்பு. இது கடந்த தேர்தலை விட 27 தொகுதிகள் கூடுதலாகும்.

தமிழகத்தில் அதிமுக ஆதிக்கம்

தமிழகத்தைப் பொறுத்தவரையில் அதிமுக 30 தொகுதிகளைக் கைப்பற்றுமாம்.. திமுகவுக்கோ 4 தொகுதிகள் தான் கிடைக்குமாம்.. கடந்த முறை 8 தொகுதிகளைக் கைப்பற்றிய காங்கிரஸ் கட்சிக்கு இம்முறை 1 தொகுதிதானாம்.. தேமுதிகவுக்கு 2 தொகுதியும் மதிமுகவுக்கு 1 தொகுதியும் கிடைக்கிறதாம்..

பீகாரில் எப்படி?

40 தொகுதிகளைக் கொண்ட பீகாரில் ஐக்கிய ஜனதா தளம் மட்டும் 19 தொகுதிகளையும் அதன் கூட்டணிக் கட்சிகள் 13 தொகுதிகளையும் கைப்பற்றுமாம்..லாலு பிரசாத்தின் ராஷ்டிரிய ஜனதா தளம் இம்முறை 8 தொகுதிகளையும் காங்கிரஸ் கட்சிக்கு ஒரே ஒரு தொகுதியும்தான் கிடைக்குமாம்..


பாஜக ஆளும் மாநிலங்களில்..

பாரதிய ஜனதா கட்சி ஆளும் மத்திய பிரதேசம், குஜராத் மாநிலங்களில் பெரும்பான்மை இடங்களை பாஜக கைப்பற்றுமாம்.. மத்திய பிரதேசத்தில் 29 தொகுதிகளில் 16 ஐயும், குஜராத்தில் 20 தொகுதிகளையும் பாஜக அணி கைப்பற்றலாம் என்பது ஹெட் லைன்ஸ் டுடேயின் கருத்துக் கணிப்பு.

உ.பி, ஆ.பி.மகாராஷ்டிராவில் எப்படி?

உத்தரப்பிரதேசத்தின் 80 தொகுதிகளில் சமாஜ்வாடி கட்சி 29 தொகுதிகளிலும் மாயாவதியின் பகுஜன் சமாஜ் கட்சி 27 தொகுதிகளிலும் பாரதிய ஜனதா கட்சி 14 தொகுதிகளிலும் வெல்லக் கூடுமாம். காங்கிரஸ் கட்சி கடந்த முறை வென்ற 26 தொகுதிகளில் 16 ஐ இழந்து 10 தொகுதிகளில்தான் வெல்லக் கூடுமாம்.. ஆந்திர பிரதேசத்தைப் பொறுத்தவரையில் ஜெகன் மோகனின் ஒய்.எஸ்.ஆர். காங்கிரஸ் 11 தொகுதிகளையும் தெலுங்கானா ராஷ்டிரிய சமிதி 11 தொகுதிகளையும் கைப்பற்றலாம். தெலுங்கு தேசம் கட்சியோ 10 தொகுதிகளிலும் காங்கிரஸ் 8 தொகுதிகளிலும் வெல்லக் கூடுமாம்.. மகாராஷ்டிராவில் 48 தொகுதிகளில் சிவசேனா 14 தொகுதிகளைக் கைப்பற்றுமாம்.. காங்கிரஸ் கட்சிக்கு 12 தொகுதிகள் கிடைக்கலாம்..


மேற்குவங்கத்தில் மமதா ஆதிக்கம்

மேற்கு வங்க மாநிலத்தைப் பொறுத்தவரையில் மமதா பானர்ஜியின் திரிணாமுல் காங்கிரஸ் கட்சி 23 தொகுதிகளைக் கைப்பற்றுமாம்... இடதுசாரிகள் கடந்த முறை கைப்பற்றியதைப் போல 15 தொகுதிகளிலும் காங்கிரஸ் 3 தொகுதிகளிலும் வெல்லக் கூடுமாம்...

எந்த அணிக்கும் போகக் கூடிய கட்சிகள்

இதில் எந்த அணிக்கும் போகக் கூடிய கட்சிகளாக கருத்துக் கணிப்பில் தெரியவந்துள்ளவை... அதிமுக, திரிணாமுல் காங்கிரஸ், பகுஜன் சமாஜ், ஒய்.எஸ்.ஆர். காங்கிரஸ், திமுக, தேமுதிக என மக்கள் அடையாளம் காட்டியுள்ளனர்.


அரசியலில் குதிக்கிறார் நடிகை பிரீத்தி ஜிந்தா

அரசியலில் குதிக்கிறார் நடிகை பிரீத்தி ஜிந்தா


மும்பை : பிரபல பாலிவுட் நடிகை, பிரீத்தி ஜிந்தா. ஐபிஎல் போட்டியில் பஞ்சாப் கிங்ஸ் லெவன் அணியின் உரிமையாளராகவும் இருக்கிறார். சமீபத்தில் தனியார் தொலைக்காட்சிக்கு அளித்த பேட்டியில் கூறியதாவது: சமீபகாலமாக நாட்டில் நடக்கும் நிகழ்வுகள் என்னை மிகவும் கவலை அடைய செய்துள்ளன. எனவே, ஒரு நல்ல மாற்றம் ஏற்பட வேண்டும் என்று விரும்புகிறேன். இந்த மாற்றத்தை ஏற்படுத்தும் முயற்சியில் ஈடுபட வேண்டும் என்று கருதுகிறேன்.

இதனால் அரசியிலில் ஈடுபடுவது பற்றி சமீபகாலமாக யோசித்து வருகிறேன். அரசியிலில் ஈடுபட்டால், நான் நேர்மையான அரசியல்வாதியாக இருப்பேன். நிச்சயம் ஊழலில் ஈடுபட மாட்டேன். அரசியலில் ஈடுபட்டால் கவர்ச்சிகரமான அரசியல்வாதியாக இருப்பேன். நல்ல ஆடைகளுடனும், நல்ல கூந்தலுடனும் காட்சி அளிப்பேன். ஒரு நாள் மக்களை சந்தித்து எனக்கு வாக்களியுங்கள் என்று கேட்பேன். ஊழல் ஒழிந்தால் இந்தியா பிரகாசிக்கும். ஊழலால் ஏழை மக்கள்தான் பாதிக்கப்படுகிறார்கள். இது எனக்கு வேதனையாக இருக்கிறது என்றார்.

Sunday, May 19, 2013

கட்சியை பலப்படுத்த போராட தயாராகும் தே.மு.தி.க

கட்சியை பலப்படுத்த போராட தயாராகும் தே.மு.தி.க

கட்சியை பலப்படுத்தும் வகையில், மாநிலம் முழுவதும், முக்கிய பிரச்னைகளை மையப்படுத்தி, போராட்டம் நடத்த, தே.மு.தி.க., தலைமை தயாராகி வருகிறது. கடந்தாண்டு, ஆகஸ்ட் மாதம், தே.மு.தி.க., தலைவர் விஜயகாந்த், மாநிலம் முழுவதும் சுற்றுப்பயணம் செய்து, பொதுக்கூட்டங்களில் பேசினார். இதில், அரசையும், முதல்வரையும் கடுமையாக விமர்சனம் செய்து பேசியதாக கூறி, பல்வேறு மாவட்ட கோர்ட்டுகளில், அவர் மீது, அரசு தரப்பில், அவதூறு வழக்குகள் தொடரப்பட்டன. இவ்வழக்குகளுக்கு பின், பொதுக்கூட்டம், கட்சி நிகழ்ச்சிகள், பத்திரிகையாளர்கள் சந்திப்பு போன்றவற்றை விஜயகாந்த் தவிர்த்து வந்தார். சட்டசபை நிகழ்ச்சிகளுக்கு செல்லாமல், கட்சி அலுவலகத்தில் இருந்தபடி, எம்.எல்.ஏ.,க்களுக்கு அவ்வப்போது ஆலோசனை மட்டும் வழங்கி வந்தார்.

அ.தி.மு.க., - தி.மு.க., உள்ளிட்ட கட்சியினர், மிகுந்த பரபரப்பாக இயங்கும் நிலையில், இது கட்சி நிர்வாகிகள் மற்றும் தொண்டர்கள் மத்தியில் சோர்வை ஏற்படுத்தியது. இதே நிலை தொடர்ந்தால், லோக்சபா தேர்தல் நேரத்தில், தொண்டர்கள் துவண்டு விடுவார்கள் என, மாநில நிர்வாகிகள் சிலர் விஜயகாந்திற்கு ஆலோசனை கூறினர்.

இதையடுத்து, மின்வெட்டு மற்றும் பின்னலாடை தொழிற்பாதிப்பை கண்டித்து, திருப்பூரில், கண்டன பேரணி மற்றும் பொதுக்கூட்டம் அறிவிக்கப்பட்டது. விஜயகாந்த் தலைமையில் பொதுக்கூட்டம் நடந்தது. இதில், தே.மு.தி.க., தலைமை, எதிர்பாராத அளவிற்கு கூட்டம் சேர்ந்தது. இதனால், திருப்பூர் பொதுக்கூட்டம், திருப்புமுனையாக அமைந்ததாக கூறி, விஜயகாந்த் உள்ளிட்ட நிர்வாகிகள் மகிழ்ச்சி அடைந்தனர். அப்போது பேசிய விஜயகாந்த், தொண்டர்களை உற்சாகப்படுத்தும் வகையில், "தே.மு.தி.க., தலைமையில் கூட்டணி அமைக்கும் காலம் வரும்' என, தெரிவித்தார்.

மேலும், மற்ற திட்டங்களை போல, டாஸ்மாக் மதுக்கடைகளுக்கும் முதல்வர் பெயர் வைக்கும் போராட்டம் நடத்தப்படும் எனவும் அறிவிப்பு வெளியிடப்பட்டது. கடந்த ஆட்சிக் காலத்தில், எதிர்க்கட்சியாக இருந்த அ.தி.மு.க., மாவட்ட வாரியாக பொதுக்கூட்டங்களை நடத்தியது. இது, அக்கட்சி தொண்டர்களை தேர்தலுக்கு தயார்படுத்தும் வகையில், அமைந்தது. தேர்தலில், அக்கட்சி மிகப்பெரிய வெற்றியையும் பெற்றது. அதே பார்முலாவைதான் இப்போது, தே.மு.தி.க., கையில் எடுக்க முடிவு செய்துள்ளது. சமீபத்தில், சென்னையில் நடந்த தே.மு.தி.க., எம்.எல்.ஏ.,க்கள் கூட்டத்தில், இது குறித்து விரிவாக விவாதிக்கப்பட்டது. "இதுபோன்ற ஆர்ப்பாட்டம், பொதுக்கூட்ட செலவுகளை, மாவட்ட நிர்வாகிகள் மீது, கட்சி தலைமை சுமத்துகிறது. ஏற்கனவே, செலவு செய்து, வருமானம் ஏதும் இல்லாமல், நொந்து போயுள்ள மாவட்ட நிர்வாகிகளால், இந்த சுமையை தாங்கிக்கொள்ள முடியாது. எனவே, அவர்களோடு, கட்சி தலைமையும், இந்த செலவுகளை பகிர்ந்து கொள்ளவேண்டும்' என, எம்.எல்.ஏ.,க்கள் கூறியுள்ளனர். இதை பரிசீலிப்பதாக, கட்சி தலைமை தெரிவித்துள்ளது.

இதையடுத்து, எந்தெந்த மாவட்டங்களில், என்னென்ன பிரச்னைகள் உள்ளன என்ற பட்டியலை தரும்படி, மாவட்ட செயலர்களிடம், தே.மு.தி.க., தலைமை, விவரம் கேட்டுள்ளது. இதனால், தே.மு.தி.க., தரப்பில், மாவட்ட வாரியாக, விரைவில், போராட்டங்கள் நடத்தப்படும் என, தெரிகிறது.-

Saturday, May 18, 2013

பிரதமரை மாற்றும் எண்ணம் இல்லை: காங்கிரஸ் திட்டவட்டம்

பிரதமரை மாற்றும் எண்ணம் இல்லை: காங்கிரஸ் திட்டவட்டம்


புதுடெல்லி, மே 18:
நிலக்கரி சுரங்க ஊழல், ரெயில்வே முறைகேடு உள்ளிட்ட பல்வேறு பிரச்சனைகளால் காங்கிரஸ் கட்சிக்கு கடும் நெருக்கடி ஏற்பட்டுள்ளது. பிரதமர் மன்மோகன் சிங் பதவி விலக வேண்டும் என்று எதிர்க்கட்சிகள் தொடர்ந்து வலியுறுத்தி வருகின்றன. இந்த சூழ்நிலையில் பிரதமர் மன்மோகன் சிங்கை முன்னிறுத்தி மக்களவைத் தேர்தலை சந்தித்தால் கட்சிக்கு பின்னடைவு ஏற்படும் என்று காங்கிரஸ் மூத்த தலைவர்கள் சிலர் கருதுகின்றனர்.

எனவே, குளிர்கால கூட்டத்தொடருக்கு முன்னதாக பிரதமர் மாற்றப்படுவார் என்றும், முன்கூட்டியே மக்களவைத் தேர்தல் நடக்க வாய்ப்பு உள்ளது என்றும் தகவல்கள் வெளியாகின.

இதுபற்றி காங்கிரஸ் செய்தித் தொடர்பாளர் பி.சி.சாக்கோவிடம் நிருபர்கள் கேட்டனர். இதற்கு பதில் அளித்த சாக்கோ, “பிரதமரை மாற்றுவது பற்றி யாரும் நினைக்க வேண்டாம். திறமையான பிரதமரை நாம் பெற்றிருக்கிறோம். தலைமை பொறுப்பு பற்றிய கேள்வி எங்களிடம் இல்லை. அரசு சிறப்பாக செயல்பட்டுக் கொண்டிருக்கிறது. எனவே, முன்கூட்டியே தேர்தல் நடத்தும் திட்டம் இல்லை” என்றார்.

வரும் தேர்தலில் ஐக்கிய முற்போக்கு கூட்டணி வெற்றி பெற்றால், மீண்டும் மன்மோகன் சிங் பிரதமராகும் வாய்ப்பு உள்ளதா? என்று கேட்டபோது, ‘தேர்தலுக்கு இன்னும் நீண்ட காலம் இருக்கிறது’ என்று கூறினார்.

“உணவு பாதுகாப்பு மசோதா மற்றும், நிலம் கையகப்படுத்துதல் மசோதாவை நிறைவேற்றுவது தொடர்பாக காங்கிரஸ் கட்சி விவாதித்து வருகிறது. பாராளுமன்ற சிறப்பு கூட்டத்தொடருக்கு நாங்கள் எதிர்ப்பு தெரிவிக்கவில்லை. இது பற்றி ஒருமனதாக எடுக்க வேண்டும். அவர்கள் தயார் என்றால், விவாதத்திற்கு நாங்கள் தயாராக இருக்கிறோம்.” என்றும் சாக்கோ கூறினார்.

Friday, May 17, 2013

சட்டவிரோதமாக இறக்குமதி செய்த ஹம்மர் காரை சி.பி.ஐ.யிடம் ஒப்படைத்தார் மு.க.ஸ்டாலின்

சட்டவிரோதமாக இறக்குமதி செய்த ஹம்மர் காரை சி.பி.ஐ.யிடம் ஒப்படைத்தார் மு.க.ஸ்டாலின்


சென்னை, மே 17:

வெளிநாடுகளில் இருந்து சட்டவிரோதமாக சொகுசு கார்கள் இறக்குமதி செய்தது தொடர்பாக, கடந்த மார்ச் மாதம் தி.மு.க. பொருளாளர் மு.க.ஸ்டாலின் வீட்டில் சி.பி.ஐ. சோதனை நடத்தியது. இதேபோல் பல முக்கிய பிரமுகர்களின் வீடுகளிலும் சோதனை செய்த அதிகாரிகள், சொகுசு கார்கள் மற்றும் அது சம்பந்தமான ஆவணங்களைக் கைப்பற்றினர். ஆனால், மு.க.ஸ்டாலின் வாங்கிய ஹம்மர் கார் பற்றிய தகவல்கள் கிடைக்கவில்லை.

ஐக்கிய முற்போக்கு கூட்டணியில் இருந்து தி.மு.க. வெளியேறிய சில நாட்களில் இந்த சோதனை நடந்தது. எனவே, இதில் அரசியல் தலையீடு இருக்கலாம் என்று அரசியல் வட்டாரத்தில் பரபரப்பாக பேசப்பட்டது.

இந்நிலையில், மு.க.ஸ்டாலின் கடந்த 2007-ம் ஆண்டு இறக்குமதி செய்த ஹம்மர் காரை இன்று சி.பி.ஐ. வசம் ஒப்படைத்தார். காரைப் பெற்றுக்கொண்ட அதிகாரிகள், இது தொடர்பாக விசாரணை நடத்த உள்ளனர்.

சுங்க விதிகளை மீறி சட்டவிரோதமாக சொகுசு கார்களை இறக்குமதி செய்த இந்த மிகப்பெரிய முறைகேடு தொடர்பாக, 18 இடங்களில் சோதனை நடத்தியதில் 17 கார்களை பறிமுதல் செய்திருப்பதாக சி.பி.ஐ. வட்டாரங்கள் தெரிவிக்கின்றன.